Saluton!

Rezulte de miaj teoriaj esporoj (oni povas konatiĝi kun ili en ĉi tiu artikolo) mi venis al konkludo, ke plej efika vojo por praktika aplikado kaj disvastigo de Esperanto estas multlingvaj projektoj, kiuj uzas ĝin kiel pontolingvon. Nuntempe mi komencis realigi projekton Renkontu, kiu baziĝas sur ĉi tiu koncepto (ĝia beta-versio situas laŭ adreso renkontu.atspace.eu).

Partoprenantoj de la projekto serĉas interesan informon en sialingvaj fontoj kaj preparas surbaze de ĝi publikaĵojn por la Esperanta versio. Poste oni tradukas ilin el Esperanto en aliajn lingvojn de la projekto. Tiele informo, aperinta en la projekto, iĝas akirebla por la plej vasta internacia aŭditorio.

La projekto havu versiojn en vaste uzataj naciaj lingvoj: angla, franca, germana, hispana, portugala, rusa, araba, hinda, ĉina. Certe, ankaŭ versioj en aliaj lingvoj povas ĉeesti (kaj jam ĉeestas). Por kelkaj el la menciitaj lingvoj mi jam trovis partoprenantojn, tamen kompleta teamo ankoraŭ ne estas formita.

Do mi serĉas por la projekto tradukantojn el Esperanto en naciajn lingvojn kaj aŭtorojn por prepari publikaĵojn (kompreneble, tio povas esti samaj personoj). Se vi mem ne sentas inklinon al tio, do eble inter viaj konatuloj en Esperantujo troviĝos interesantoj -- ne hezitu konigi la projekton al ili. Se ni sukcesos efektivigi ĉi tiun iniciaton, ĝi povas estiĝi unua paŝo al tio, ke Esperanto servos jam ne al unu aŭ du milionoj, sed al centoj da milionoj da homoj.

Saluton,

Estas tre bone ke vi volas engaĝiĝi en tia traduklaboro, sed kial ne fari tion en la jam ekzistantaj projektoj?

Partoprenantoj de la projekto serĉas interesan informon en sialingvaj fontoj kaj preparas surbaze de ĝi publikaĵojn por la Esperanta versio. Poste oni tradukas ilin el Esperanto en aliajn lingvojn de la projekto. Tiele informo, aperinta en la projekto, iĝas akirebla por la plej vasta internacia aŭditorio.

Tiel oni jam povas uzi Vikipedion, ekzemple per tradukado en esperanto de la plej kompletaj nacilingvaj artikoloj, kaj poste per ilia tradukado el esperanto al aliaj nacilingvoj (kvankam tiu dua laboro senutilas laŭ mi, ni preferas ke aliuloj lernu esperanton, ĉu ne?).
Temas pri grandega laboro apenaŭ komencita, ĉu vi vidis kiom malplena estas la plejparto de la esperantaj artikoloj?

Se temas pri aktualaĵoj, jam ekzistas Tutmondaj Voĉoj.

Mi tute ne volas senkuraĝigi vin, sed mi opinias ke sur la reto esperantistojn devus prefere kunlabori ol dislabori.

Saluton!

Dankon pro bonaj demandoj.

kial ne fari tion en la jam ekzistantaj projektoj?

Ĉar la proponata projekto diferenciĝas de la jam ekzistantaj laŭ siaj koncepto kaj strukturo, do ili ne povas anstataŭi ĝin. Formato de materialoj, kiuj aperu tie, ne taŭgas por Vikipedio aŭ Tutmondaj Voĉoj. Krome, publikigi ĝuste "aktualaĵojn" ne aspektas plej efika vojo disvolvigi la projekton, ĉar ili rapide malaktualiĝas kaj fariĝas senutila balasto. Niaj fortoj estos neeviteble limigitaj, do pli bone estas uzi ilin por prezenti informon, interesan per si mem, kiu vekos atenton ankaŭ post kiam tempo pasos.