Riano:Kial oni havu regulojn pri tio, ĉu demando estas komencanta aŭ spertula? Neniel malbonas se komencanto afiŝas demandon en Esperanto pri la akuzativo aŭ se spertulo volas demandi pri iu komplika gramatika afero en sia propra lingvo. Ankoraŭ temas pri Esperanto, ĉu ne? Se temus pri alia lingvo, mi opinius, ke oni ja ne afiŝu en sia nacilingva forumo, ĉar temas pri demandoj pri Esperanto. Eble oni nur celas anglaparolantojn. Neniel malbonas tio, ĉu ne?

Mi ne havas fortan opinion pri la temo, fakte. Sed iuj personoj havas fortan opinion - ŝajnas ke Chainy forte kredas ke komplikaj lingvaj demandoj estu nur en Esperanto-forumoj, kaj sudanglo kredas ke ili estu bonvenaj ankaŭ en nacilingvaj forumoj.

Kiam la demando laste profunde diskutiĝis, montriĝis ke eĉ inter komencantoj estas diversaj opinioj. Kelkaj ŝatas legi pri tiuj komplikaj aferoj en lingvo kiun ili povas kompreni, kaj kelkaj sentis sin konfuzitaj pri detalaj diskutoj de temoj kiujn ili ne komprenas.

Unu afero pri kiu mi *ja* povas doni opinion - se ni volus limigi tiajn diskutojn al la Esperanto-forumoj, devus esti klara regulo pri tio, per kiu plej multaj uzantoj sukcesus kompreni, ĉu specifa temo apartenu nur al Esperanto-forumoj, aŭ ĉu estus enorde meti ĝin ankaŭ en nacilingvajn forumojn.

Tial mi demandas pri vortigo de regulo.

Kompreneble komencanto kiu volas demandi en Esperanto ĉiam estas bonvena en Esperanto-forumoj, do simplaj demandoj povus aparteni al ambaŭ lokoj, laŭ la prefero de la demandanto. Tiusence la demando temas nur pri tiuj komplikaj demandoj.

Vilius:Ĉi tiu fadeno estas pruvo, ke Esperantujo vere bezonas ĝeneralan forumejon, kie homoj povus veni por sia dozo de trolado, venenoplenaj diskutbataloj kaj iom da saĝaj vortoj. Tiam eble Lernu finfine restus al lernantoj, al kiuj ĝi vere devus aparteni.
Fakte, en fejsbuka grupo "Esperanto" de tempo al tempo okazas sufiĉe (almenaŭ laŭ mia gusto) venenaj "diskutoj" (kaj la saĝajn vortojn, kompreneble skribas mi mem ). Nuntempe trolado mankas, tamen mi sentas, ke baldaŭ komencos, ĉar kvanto da larĝokulaj iluziuloj vere petegas esti primokataj

Revivigu ni esperantochan-on.

Verdire, mi opinias ke la ĉefa celo de Lernu! estas Esperanto, ĉu ne? Do, la naciaj forumoj devas esti duaranga aldono, sed la koro devas esti nur la forumoj en Esperanto. Pro la sama kialo, mi pensas ke miksitaj forumoj Esperanto + nacia lingvo (ne Esperanto + multaj naciaj lingvoj) povas esti tre bonaj.

Dolorigas min ke tiu ĉi tre grava fadeno, kiu tuŝas ĉiujn Lernu-uzantojn, okazas ĉefe en la angla (fakte, nur en la angla ĝis antaŭ 2 tagoj).

Mi volas kopii ĉi tien (ekde la angla forumo) la proponon, laŭ mi tre saĝan, de Chainy pri la forigo de mesaĝoj kaŭze de la malĝusta lingvo.

Chainy:Ene de la nuna forum-sistemo de Lernu, se administranto tiel faras, la mesaĝo ŝajne estas perdita por ĉiam... Se ni decidos, ke tiaj Esperantlingvaj mesaĝoj devas ĉiam havi nacilingvan tradukon en nacilingvaj forumoj, tiam ni devas klarigi en la regularo, ke uzuloj havos tempodaŭron de, ekzemple, unu tago dum kiu ili devas fari tradukon. Se ili tion ne faras dum tiu tempodaŭro, tiam administranto rajtas forigi la mesaĝon. Necesas klarigi tian tempodaŭron, por doni al uzuloj justan ŝancon doni tradukon. En la nuna sistemo, estas tute hazarde, kiam tiaj forigoj de mesaĝoj okazas, kio certe ne estas bona agmaniero.

Kaj mi volas ankaŭ traduki la komentojn de Hyperboreus (denove ekde la angla forumo):

Hyperboreus, tradukita de mi,:Pssst, diru al neniu ke en Esperanto-forumo mesaĝoj estas forigataj ĉar ili estas en Esperanto. (...)

La demando estas "cui bono?" (por kiu estas bone?)
Kiu en tiu fadeno - ni estas ĉiuj Esperanto-lernantoj aŭ -parolantoj - akiris ion pozitiva kiam tiu mesaĝo foriĝis?

Aŭ eble "cui malo?" (por kiu estas malbone?)
Kiu suferis netolereblajn animdolorojn kiam ruĝadomo [homo kies mesaĝo foriĝis lastatempe] afiŝis sian - prudentan - mesaĝon en Esperanto [en angla forumo]?

raffadalbo:Verdire, mi opinias ke la ĉefa celo de Lernu! estas Esperanto, ĉu ne? Do, la naciaj forumoj devas esti duaranga aldono, sed la koro devas esti nur la forumoj en Esperanto. Pro la sama kialo, mi pensas ke miksitaj forumoj Esperanto + nacia lingvo (ne Esperanto + multaj naciaj lingvoj) povas esti tre bonaj.

Mi samopinias!

raffadalbo:... mi pensas ke miksitaj forumoj Esperanto + nacia lingvo (ne Esperanto + multaj naciaj lingvoj) povas esti tre bonaj.

Ĝis nun ne ekzistas tiaj forumoj, ĉar la nacilingvaj forumoj devas esti ĉefe por komencantoj, kiuj ankoraŭ ne komprenas Esperanton. Tute ne helpas al tiaj komencantoj, se ili ne komprenas la Esperantlingvajn respondojn al iliaj demandoj, do kial afiŝi en Esperanto por tiaj komencantoj?

Eble vi intencas diri, ke forumoj en unu nacia lingvo ja devas plu ekzisti por helpi al ne-parolantoj de Esperanto, kaj samtempe devas esti certa alia loko, kie ja estas permesate afiŝi en Esperanto kaj en unu nacia lingvo. Sed tiuokaze, mi ne tute komprenas la celon de tia forumparto - se oni akceptas, ke ĉiuj partoprenantoj kapablas kompreni mesaĝojn en Esperanto kaj ankaŭ la elektita nacia lingvo, do kial permesi tiujn du lingvojn en unu fadeno? Kiu fakte volus tion? - se oni komprenas ambaŭ lingvojn, la konversacio iel iras pli glate se oni interkonsentas pri la uzenda lingvo.

Estas tre granda diferenco de aktiveco en la angla forumo kaj la aliaj nacilingvaj forumoj. Unu kialo estas la anonco "Laste en la forumo", aperanta sur la ĉefpaĝo. Ĉar ĝi strikte reflektas novajn anoncojn, oni ofte vidas plejparte anglajn fadenojn, dum iuj aliaj lingvoj neniam estas videblaj. (La malmultaj novaj alilingvaj afiŝoj eĉ povus esti faritaj en la nokto, kiam oni dormas.) Tio signifas la angla altiras plu da partoprenantoj kaj kreskas kaj ekestas ankoraŭ pli granda. Ĉu oni povus ŝanĝi la "Laste en la forumo" al montrado de teksto kaj enhavo "En diversaj forumoj" aŭ io simila?

Mi nun afiŝas nur Esperante en la anglalingva forumo, kaj mi ĉiam aldonas Guglo-tradukon de miaj mesaĝoj. Estas nur malgranda eksperimento. Do, iu kiu fakte scipovas legi iun nacian lingvon, sed ne kapablas skribi en tiu lingvo, certe povas uzi tiun manieron por partopreni en la diskutoj. Tiamaniere, ĉiuj diskutoj restas kompreneblaj al komencantoj, almenaŭ certagrade, depende de la kapricoj de la Guglo-tradukilo!

Mi volas tamen aldoni, ke mi ne tute komprenas la intereson pri iu permeso al Esperantlingvaj mesaĝoj en nacilingvaj forumoj. Tiuj forumoj ja devas esti por bazaj lingvaj demandoj pri Esperanto. Ekzemple, kiam mi uzu la n-finaĵon?, kio estas adjektivo?, kiel mi diru jen tion ĉi en Esperanto? ktp... Nu eble estas iuj homoj, kiuj povas kompreni tiajn interesegajn demandojn en iu nacia lingvo, sed ili scipovas respondi nur en Esperanto - mia demando estas, ĉu tiuj homoj ne povas lasi la respondecon al iu alia, kiu fakte ja parolas la koncernan nacian lingvon? Se iu freŝbakita komencanto ne scias, kio estas adjektivo, tiam li plej verŝajne ne komprenos klarigon en Esperanto.

Sed, eble mi miskomprenas la situacion, kaj homoj fakte preferus, ke la nacilingvaj forumoj estu lokoj por diversaj diskutoj, ankaŭ pri pli komplikaj lingvaj aferoj, aŭ eĉ pri aferoj tute ne ligitaj al Esperanto. Fakte, ŝajnas al mi, ke en multaj aliaj nacilingvaj forumoj jam estas tiel. En la anglalingva forumo ĉeestas la sola aktiva forum-administranto de Lernu (Erin), do ŝi kontrolas ĉion relative strikte.

Persone, mi emus preferi sistemon, kie nacilingvaj forumoj estas por simplegaj lingvaj demandoj de freŝbakitaj komencantoj, kaj la Esperantlingvaj forumoj estu la loko por granda libereco pri temoj ktp. Eble tio donus instigon al komencantoj ekpartopreni ankaŭ en la Esperantlingvaj forumoj?

Rugxdoma:Estas tre granda diferenco de aktiveco en la angla forumo kaj la aliaj nacilingvaj forumoj. Unu kialo estas la anonco "Laste en la forumo", aperanta sur la ĉefpaĝo. Ĉar ĝi strikte reflektas novajn anoncojn, oni ofte vidas plejparte anglajn fadenojn, dum iuj aliaj lingvoj neniam estas videblaj. (La malmultaj novaj alilingvaj afiŝoj eĉ povus esti faritaj en la nokto, kiam oni dormas.) Tio signifas la angla altiras plu da partoprenantoj kaj kreskas kaj ekestas ankoraŭ pli granda. Ĉu oni povus ŝanĝi la "Laste en la forumo" al montrado de teksto kaj enhavo "En diversaj forumoj" aŭ io simila?

Tio fakte estas interesa ideo. Se oni plibonigus la videblecon de mesaĝoj en diversaj nacilingvaj forumoj, tiam eble pli da homoj partoprenus en ili.

Chainy:Persone, mi emus preferi sistemon, kie nacilingvaj forumoj estas por simplegaj lingvaj demandoj de freŝbakitaj komencantoj, kaj la Esperantlingvaj forumoj estu la loko por granda libereco pri temoj ktp. Eble tio donus instigon al komencantoj ekpartopreni ankaŭ en la Esperantlingvaj forumoj?

Interalie, mi volas diri ke mi trovas viajn Guglo-tradukojn esti perfekte kompreneblaj (nur kun kelkaj amuzaj eraroj).

Se iu sincere ne povas verki en la angla sed volas partopreni en tiu forumo, laŭ mi tiu metodo funkcias tre bone.

Sed mia baza demando restas - se (hipoteze) ni limigus la nacilingvajn forumojn al simplegaj lingvaj demandoj, kiel vi vortumus tion en simpla regulo? Mi havas malgrandan ideon pri tio, sed mi volus aŭdi, ĉu vi havas alian ideon.