erinja:Mi povus imagi ke tiuj kiuj estas korektemaj vidus la indikon "1 korekto" kaj pensus "Ho, iu jam korektis ĝin, mi ne devas okupiĝi pri ĝi, kvankam la enhavo de la korekto eble estas malĝusta.

Vi pravas, ke tio povus eble fariĝi problemo.

Por solvi ĝin, eblus indiki krome "1 korekto de altnivelulo" aŭ simile - certe ankaŭ tiaj korektoj ne estas garantie ĝustaj, sed almenaŭ pli fidindaj.

erinja:Se ĉiuj rajtus korekti, estus neniu maniero por scii ĉu la korektoj estas ĝustaj, aŭ se estus pluraj korektoj, kiam ili atingos sian finan staton. Kaj se estus senkorekta mesaĝo, ĉu tio signifas ke la mesaĝo estas tute ĝusta, aŭ ĉu tio signifas simple ke neniu traktis ĝin? Se estas longega mesaĝo plenplena je eraroj, se oni eĉ ne certas pri la signifo de la enhavo, mi povas imagi ke multaj personoj elektus ne pasigi sian tempon je korektado de tiu mesaĝo. Estas facile decidi korekti mesaĝeton kiel "Vivas internacia lingvon"; estas malfacile decidi korekti tute nekoheran mesaĝon kiu havas la maksimuman permesitan longecon. Ni ĉiuj scias ke tiaj mesaĝoj aperas en la forumoj, kaj ne tre malofte.

Tiuj problemoj jam en la nuna sistemo, kie uzantoj korektas per apartaj forumaj mesaĝoj, povas ekzisti - kaj ŝajne praktike ne estas gravegaj problemoj.

Kaj kion faras la lingvohelpantoj pri korespondoj nekompreneblaj?

darkweasel:Tiuj problemoj jam en la nuna sistemo, kie uzantoj korektas per apartaj forumaj mesaĝoj, povas ekzisti - kaj ŝajne praktike ne estas gravegaj problemoj.

Mi ofte vidis ke oni korektis partojn de iu mesaĝo, kaj kutime ne estis gravaj problemoj pri tio. Sed kiam temas pri unu el la longegaj kaj erarplenaj mesaĝoj, mi neniam vidis ke iu provis korekti la tuton. La plej longaj tekstoj por kiuj mi vidis korektojn kutime estis tradukitaj kantoj aŭ poemoj, kiam uzanto tradukis ion, kaj afiŝis la tradukon tiel ke aliaj helpu ŝ/lin korekti la enhavon.

Kaj kion faras la lingvohelpantoj pri korespondoj nekompreneblaj?

Mi donas pli ol unu respondon. "Se vi celis ..., tio devus esti ...; se vi celis ...., tio devus esti...; se mi malbone komprenis vin, bv. diri al mi en la angla kion vi volis diri, kaj mi helpos vin traduki tion"

Sed praktike estas multege pli facile en la lingvohelpantaj korespondoj, ĉar la tekstoj estas tre mallongaj (kutime nur unu frazon por ĉiu respondo) kaj la respondoj mem estas relative limigitaj, ĉar ili 70%-e temas pri la enhavo de rakontoj kiujn mi konas tre bone.

Mi ŝajnas memori ke vi mem estas lingvohelpanto; eble mi malĝuste memoras. Mi ne scias ĉu vi estas korektanto por la kurso "Kio Okazas?", sed tiu kurso estas multege pli temporaba por korektado, ĉar la tekstoj estas multege pli longaj, kaj la lernantoj verkas propran rakonton, do la rango de eblaj respondoj estas multege pli vasta ol ĉe Ana Pana kaj Ana Renkontas.

erinja:

darkweasel:Tiuj problemoj jam en la nuna sistemo, kie uzantoj korektas per apartaj forumaj mesaĝoj, povas ekzisti - kaj ŝajne praktike ne estas gravegaj problemoj.

Mi ofte vidis ke oni korektis partojn de iu mesaĝo, kaj kutime ne estis gravaj problemoj pri tio. Sed kiam temas pri unu el la longegaj kaj erarplenaj mesaĝoj, mi neniam vidis ke iu provis korekti la tuton. La plej longaj tekstoj por kiuj mi vidis korektojn kutime estis tradukitaj kantoj aŭ poemoj, kiam uzanto tradukis ion, kaj afiŝis la tradukon tiel ke aliaj helpu ŝ/lin korekti la enhavon.

Mi tamen ne komprenas, kial limigo de la korektfunkcio al lingvohelpantoj povas solvi tion. Mi ne atendas, ke estos ekstreme pli multaj korektoj en mia sistemo - mi nur volas meti ilin al alia loko. Jen [url=?t=5270]ekzemplo de tio, kion ĝi verŝajne malpliigos[/url] (la tiea mesaĝo de "sinjoro" estas ja tre trafa).

erinja:
Mi ŝajnas memori ke vi mem estas lingvohelpanto; eble mi malĝuste memoras.

Vi tute ĝuste memoras - temis pri retorika demando. Mia sistemo estas tre simila al la lingvohelpa sistemo kaj tial laŭ mi povas same bone funkcii. Almenaŭ indas provi ĝin.

Mi tamen fakte rimarkis, ke nia diskuto iom detemiĝis. Mia propono evidente tute ne rilatas al eventuala spertula forumparto, sed povas ekzisti kun aŭ sen tiu, tute same bone.

darkweasel:Mi tamen ne komprenas, kial limigo de la korektfunkcio al lingvohelpantoj povas solvi tion. Mi ne atendas, ke estos ekstreme pli multaj korektoj en mia sistemo - mi nur volas meti ilin al alia loko.

Komprenu, mi ne provas "mortigi" vian ideon, sed mi pensas pri efektivigo de la ideo, kaj eblaj neatenditaj konsekvencoj pri la efektivigo de tiu ideo. Mi ŝatas la ideon plifaciligi la korektadon de forumaj skribaĵoj. Sed samtempe mi ne volus doni la impreson ke iu skribaĵo estas tute ĝusta, nur pro tio ke ĝi havas "nul korektojn". Kaj se ĝi havas korekton, mi ne volas ke aliaj pensu ke la enhavo de tiu korekto nepre estas ĝusta. Se estus lingvohelpanto kiu korektus tion, oni havus minimuman nivelon de fido pri la korekto.

Ni supozu ke oni skribus mesaĝon, kaj uzanto je "baza" nivelo korektis ĝin. Ni supozu ke ne aperas sekvaj korektoj. Ĉu oni ne fidu je la korektoj, pro tio ke baznivela uzanto korektis ĝin? Tiuj korektoj povus esti perfektaj, aŭ ili povus esti eraraj. Kiel oni povus taksi tion?

Mi estas du-mensa pri ĉi tiu afero. Efektive mi ŝatas la ideon kaŝi la korektojn (krom por tiuj kiuj klakas por vidi), ĉar tio malhelpas devojigon de diskutoj.

Sed se la korektoj estas kaŝitaj, mia diveno estas ke multaj legantoj ne klakos al la butono por rigardi la korektojn. Kaj se oni efektive *volas* diskuti la enhavon de la korektoj ("Kial vi korektis la aferon tiel anstataŭ ĉi tiel?"), ĉu tiu diskuto okazu en la "korektejo" (kun postaj ciferoj, ekz "Korektoj: 25"), aŭ ĉu oni kreu novan fadenon pri tio, aŭ kio?

Ja devojigoj ne estas tre belaj kiam oni volas diskuti iun temon sed la diskutoj estas laŭ mi instruaj por lernantoj. Kaj se la kapablo korekti estas donita al ĉiu uzanto, ne gravas la nivelo, mi mensogus se mi dirus ke mi ne antaŭvidas problemojn pri tio. Sufiĉe ofte oni vidas malĝustajn respondojn al demandoj en ĉi tiuj forumoj, sed kun la nuna sistemo, tio rapide kaptiĝas kaj korektiĝas.

erinja:
Sed se la korektoj estas kaŝitaj, mia diveno estas ke multaj legantoj ne klakos al la butono por rigardi la korektojn. Kaj se oni efektive *volas* diskuti la enhavon de la korektoj ("Kial vi korektis la aferon tiel anstataŭ ĉi tiel?"), ĉu tiu diskuto okazu en la "korektejo" (kun postaj ciferoj, ekz "Korektoj: 25"), aŭ ĉu oni kreu novan fadenon pri tio, aŭ kio?

Korektoj de korektoj okazu en la korektejo, dum eventualaj sekvaj diskutoj okazu en aparta foruma fadeno.

Mi imagas tion proksimume jene:

Originala mesaĝo: Ĉu tiu frazo estas korekta?

Korekto 1: Anstataŭ "korekta" vi skribu "ĝusta".

Korekto 2: Fakte tiu uzo de "korekta" estas ja tute bona.

... kaj se nun la unua korektanto malkonsentas kun tio, ĝi malfermu novan fadenon (kaj donu en la korektejo ligilon al ĝi). Ni evidente ne povas fidi, ke la uzantoj tion ĉiam faros, do eble indas krei funkcion por teamanoj kaj forumaj administristoj "krei foruman fadenon el la korektoj 3-7" aŭ simile. (Mi tamen ne atendas, ke tio estos tro ofte necesa.)

Vi tamen pravas, ke ĉiu sistemo estas nur tiel bona kiel ĝiaj uzantoj. Ĉu eble instali RSS-fluon de ĉiuj korektoj en la tuta forumo, por ke spertuloj povu korekti malĝustajn korektojn?

Mi ne komprenas la signifon de ĉio ĉi.. Ĉu vi planas korekti kaj forbari ankaŭ la tutan interreton? La reto ja estas abunda je esperantaj eraroj kaj tiu forumo ne estas escepto. Kial iu bezonas korekti ĉi tiun forumon, samtempe provokante superfluajn ofendojn kaj korekt-militojn, anstataŭ legi lingve fidindajn fontojn?

Ŝak:Mi ne komprenas la signifon de ĉio ĉi.. Ĉu vi planas korekti kaj forbari ankaŭ la tutan interreton? La reto ja estas abunda je esperantaj eraroj kaj tiu forumo ne estas escepto. Kial iu bezonas korekti ĉi tiun forumon, samtempe provokante superfluajn ofendojn kaj korekt-militojn, anstataŭ legi lingve fidindajn fontojn?

nu, ŝajne jam nun uzantoj (malofte mi) sentas bezonon korekti mesaĝojn de aliaj, mi nur proponas specialan lokon por tio.

darkweasel
Mi demandis la komencinton de la temo

Ŝak:Mi ne komprenas la signifon de ĉio ĉi.. Ĉu vi planas korekti kaj forbari ankaŭ la tutan interreton?

Fakte mia celo kiam mi kreis ĉi tiun fadenon neniam estis proponi ke oni korektu forumajn mesaĝojn!

Se vi legos mian proponon atente, vi vidos ke mia propono estis krei unu parton de la forumo en kiu nur altnivelaj parolantoj rajtus afiŝi. Ne estus korektoj al la mesaĝoj. La afero ke nur spertujoj rajtas afiŝi tie donus ian certecon pri la lingva ĝusteco de la enhavo, tiel ke komencantoj povus senti ian fidon, ke se ili legas ĉi tiun parton de la forumo, la enhavo estos lingve relative senerara.

Mi ne parolis pri la tuta interreto, nur pri unu malgranda parto de la vasta forumaro de lernu. La cetero de la forumoj restus, kiel nun, nekorektita kaj malfermita al ĉiuj.

Aliaj personoj poste proponis oferti la eblon korekti ĉiun foruman mesaĝon, por helpi al la legantoj de la forumo plibonigi sian kapablon, pro tio ke ĉi tiu estas retpaĝo pri lernado.

Mi havas miksitajn pensojn pri tio.

Mi plu pensas ke en ĉi tiuj forumoj aperas sufiĉe multaj longaj mesaĝoj kiuj estas tute konfuzaj, kaj lingve kaj enhave, kaj neniu vere volos korekti tiujn mesaĝojn. Kiu volas malŝpari sian tempon je nekohera frenezaĵo?

Bonvolu provi la fadenon! Indiku ĝin, ke kontribuado de komencantoj estas malpermesita kaj ekprovu, kio okazos. Se tio pli poste ne plaĉos al vi, tiam vi kiel teamano povos la fadenon nuligi!